અમરેલી,
અમરેલી શહેર અને જિલ્લામાં આજે બપોર બાદ વાતાવરણમાં પલ્ટો આવતા આકાશમાં કાળા ડીબાંગ વાદળો છવાયા હતાં અને વિજળીનાં કડાકા ભડાકા સાથે જિલ્લામાં કેટલાક સ્થળોએ હળવો ભારે વરસાદ શરૂ થયો હતો. લીલીયાનાં હાથીગઢ અને આસપાસનાં ગામોમાં આજે બપોરનાં એક થી દોઢ ઇંચ જેવો વરસાદ પડી જતા ખેતીપાકને સારો ફાયદો થશે. સારા વરસાદનાં કારણે ખેડુતોમાં ખુશી વ્યાપી હોવાનું શ્રીકાંતદાદાની યાદીમાં જણાવાયુંછે. બગસરા શહેરમાં માત્ર ઝરમર વરસાદ પડ્યાનું રૂપેશ રૂપારેલીયાએ જણાવ્યું છે. જ્યારે બાબાપુરમાં આજે બપોરનાં વરસાદનું જોરદાર ઝાપટુ પડી જતા જોરદાર પાણી વહી ગયાં હતાં. જ્યારે ગાવડકા અને ખીજડીયામાં વરસાદનું હળવુ ઝાપટુ પડ્યાનું હસુભાઇ રાવળે જણાવ્યું હતું. દામનગર શહેરમાં વરસાદનું ઝાપટુ પડ્યાનું વિનોદભાઇ જયપાલે જણાવ્યું છે. ધારી શહેરમાં અડધોઇંચ વરસાદ પડ્યાનું ઉદય ચોલેરાની યાદીમાં જણાવ્યું છે. લાઠી શહેરમાં બપોર બાદ એકથી દોઢ ઇંચ જેવો વરસાદ પડ્યો હતો તેમ વિશાલ ડોડીયાએ જણાવ્યું છે. લાઠીનાં અકાળામાં ધોધમાર એક થી દોઢ ઇંચ જેવો વરસાદ પડી જતા ખેતીપાકને ફાયદો થશે તેમ રાજુભાઇ વ્યાસે જણાવ્યું હતું. ચિતલમાં આજે બપોરથી સાંજ સુધીમાં ધોધમાર દોઢ થી બે ઇંચ જેવો વરસાદ પડી જતા ખેડુતોમાં ખુશ વ્યાપ્યાનું ધર્મેશભાઇની યાદીમાં જણાવાયું છે. રાજુલા શહેરમાં વરસાદનાં હળવા ઝાપટા પડ્યાનું જયદેવ વરૂની યાદીમાં જણાવાયું છે. વડીયા શહેરમાં અડધો ઇંચ જેવો વરસાદ પડતા વાતાવરણમાં ઠંકડ પ્રસરી હતી તેમ ભીખુભાઇ વોરાએ જણાવ્યું હતું. મોટા આંકડીયામાં વરસાદનું હળવુ ઝાપટુ પડ્યાનું મનોજભાઇ ત્રીવેદીએ જણાવેલ. અમરેલી નજીકનાં ફતેપુર, વિઠલપુર, ચાંપાથળમાં ધોધમાર દોઢ ઇંચ જેવો વરસાદ પડ્યાનું સતીષ રાઠોડની યાદીમાં જણાવાયું છે. સાવરકુંડલામાં હળવા ભારે ઝાપટાથી એક ઇંચ જેવો વરસાદ પડ્યો હતો તેમ સૌરભ દોશીએ જણાવ્યું હતું. અમરેલીમાં એક અને વિજપડીમાં એક ઇંચ વરસાદ પડ્યો હતો. જાફરાબાદ બંદરે 3 નંબરનું ભયસુચન સિગ્નલ લગાવીને પ્રશાસને માછીમારોને દરિયો ન ખેડવા સુચના આપી છે.
