ચીન,પાકિસ્તાન સાથે જોડાયેલી સરહદ પરના ૪૪ પુલોનું રક્ષામંત્રીના હસ્તે ઉદઘાટન

એકસાથે ૪૪ પુલ દેશને સોંપાયા:સંરક્ષણમંત્રીએ ૭ રાજ્યો-કેન્દ્રશાસિત પ્રદેશોમાં ૪૪ પુલનું ઉદઘાટન કર્યું, અરુણાચલમાં બનશે સુરંગ
સંરક્ષણમંત્રી રાજનાથ સિંહે સોમવારે ૭ રાજ્યના સીમાડાના વિસ્તારોમાં બનેલા ૪૪ પુલનું વિડિયો-કોન્ફરન્સિંગ દ્વારા ઉદઘાટન કર્યું હતું. રાજનાથે અરુણાચલ પ્રદેશમાં એક સુરંગનો શિલાન્યાસ પણ કર્યો છે. બોર્ડર રોડ ઓર્ગેનાઈઝેશન (બીઆરઓ)એ કહૃાું હતું કે આ પુલોની વ્યૂહાત્મક અગત્યતા જ નથી, પરંતુ એ સુદૂર વિસ્તારો સાથે સંપર્ક સ્થાપિત કરવામાં પણ મદદરૂપ થશે.
આ પુલ લદાખ, અરુણાચલ પ્રદેશ, સિક્કિમ, હિમાચલ પ્રદેશ, ઉત્તરાખંડ, પંજાબ અને જમ્મુ-કાશ્મીરમાં બનાવાયા છે. એની મદદથી સેનાની સશસ્ત્ર ટુકડીઓ ઝડપથી સરહદે ફોરવર્ડ લોકેશન સુધી પહોંચી શકે છે. ચીનની સાથેના વિવાદને જોઈને ભારત સરહદી વિસ્તારોમાં અનેક અન્ય મહત્ત્વના પ્રોજેક્ટ્સ પર પણ કામ કરી રહૃાું છે.
આ તમામ પુલોને સેનાના બોર્ડર રોડ ઓર્ગેનાઈઝેશને તૈયાર કર્યા છે. ૭ પુલ લદાખમાં તૈયાર કરાયા છે. આ ઉપરાંત જમ્મુ-કાશ્મીરમાં ૧૦, હિમાચલમાં ૨, ઉત્તરાખંડમાં અને અરુણાચલમાં ૮-૮ અને સિક્કિમ તથા પંજાબમાં ૪-૪ પુલ બનાવાયા છે.
અરુણાચલ પ્રદેશના નેચિફુમાં નિર્માણ પામનારી સુરંગ તવાંગના એક મુખ્ય માર્ગ પર બનાવવામાં આવશે. હિમાચલના દારચાને લદાખથી જોડવા માટે પણ સડક બનાવાઈ રહી છે. આ સડક અનેક ઊંચા બર્ફીલા પહાડોમાંથી પસાર થશે. એ લગભગ ૨૯૦ કિમી લાંબી હશે. આ તૈયાર થવાથી કારગિલ સુધી સેનાની પહોંચ સરળ બનશે.