દુનિયાના સૌથી મોટા મોટેરા સ્ટેડિયમનું રાષ્ટ્રપતિએ ઉદ્ધાટન કર્યું

  • મોટેરા સ્ટેડિયમ: સરદાર પટેલ OUT, મોદી IN

દુનિયાના સૌથી મોટા ક્રિકેટ સ્ટેડિયમ એવા મોટેરાનું આજે રાષ્ટ્રપતિ રામનાથ કોવિંદે ઉદ્ઘાટન કરી દીધું છે. આ સ્ટેડિયમને નરેન્દ્ર મોદી સ્ટેડિયમ નામ આપવામાં આવ્યું છે. રાષ્ટ્રપતિએ સ્ટેડિયમનું ઉદ્ઘાટન કર્યું તે સાથે જ સ્ટેડિયમના ગેટ પર નરેન્દ્ર મોદી સ્ટેડિયમ નામના બોર્ડ લગાડી દેવામાં આવ્યા હતા. રાષ્ટ્રપતિ રામનાથ કોવિંદ અને ગૃહમંત્રી અમિત શાહે સરદાર વલ્લભભાઈ પટેલ સ્પોર્ટ્સ એક્ધલેવનું ભૂમિપૂજન કર્યું હતું.

આજે સ્ટેડિયમના ઉદ્ઘાટનના કાર્યક્રમમાં રાષ્ટ્રપતિ ઉપરાંત, કેન્દ્રિય ગૃહમંત્રી અમિત શાહ, રમતગમત મંત્રી કિરણ રિજીજૂ, ડે. સીએમ નીતિન પટેલ પણ મંચ પર હાજર રહૃાા હતા.

કેન્દ્રિય ગૃહમંત્રી અમિત શાહે સ્ટેડિયમના ઉદ્ઘાટન પ્રસંગે જણાવ્યું હતું કે, અમદાવાદમાં ૨૩૩ એકર જમીન ઉભા થનારા સરદાર પટેલ સ્પોર્ટ્સ એક્ધ્લેવનો આ સ્ટેડિયમ એક ભાગ છે. નારણપુરામાં પણ ૧૮ એકર જમીન પર એક સ્પોર્ટ્સ એન્કલેવ બનશે. આમ, નરેન્દ્ર મોદી સ્ટેડિયમ, સરદાર પટેલ સ્પોર્ટ્સ એક્ધલેવ અને નારણપુરાના સ્પોર્ટ્સ એક્ધ્લેવ થકી આંતરરાષ્ટ્રીય કક્ષાના રમતોત્સવનું આયોજન થઈ શકે તેવું વૈશ્ર્વિક કક્ષાનું ઈન્ફ્રાસ્ટ્રક્ચર ઉભું થઈ શકશે. તેમાં કોમનવેલ્થ, એશિયાડ તેમજ ઓલિમ્પિક કક્ષાના રમતોત્સવ પણ આયોજિત કરી શકાશે. આ ઈન્ફ્રાસ્ટ્રક્ચર ઉભું થયા બાદ અમદાવાદ દેશભરમાં સ્પોર્ટ્સ સિટી તરીકે ઓળખાશે.

અમિત શાહે જણાવ્યું હતું કે, ઓલિમ્પિકમાં રમાનારી તમામ રમતો રમાઈ શકે તેવી વ્યવસ્થા સરદાર પટેલ સ્પોર્ટ્સ એક્ધ્લેવમાં ઉભી કરવામાં આવશે. જેમાં ત્રણ હજાર ખેલાડીઓ રોકાઈ શકે તેવી સવલત પણ હશે. આ ઉપરાંત, સ્ટેડિયમમાં મેચ જોવા આવનારા લોકો માટે વિશાળ પાર્કિંગ પણ આ સ્ટેડિયમમાં ઉભું કરવામાં આવી રહૃાું છે. આંતરરાષ્ટ્રીય ઈવેન્ટનું આયોજન કરવા માટે તેના સ્ટાન્ડર્ડ અનુસાર, ૫૦ કિલોમીટરના વિસ્તારમાં જ તમામ વ્યવસ્થા ઉભી કરાશે. પીએમ મોદીએ સ્પોર્ટ્સને પ્રોત્સાહન આપવા ખેલો ઈન્ડિયા, ફિટ ઈન્ડિયા જેવા અભિયાન પણ શરુ કરાવ્યા છે તેવું જણાવતા અમિત શાહે જણાવ્યું હતું કે ખેલાડીઓ માટે સરકારે ડાયિંટગ, ટ્રેનિંગ સહિતના તમામ ક્ષેત્રે બધી વ્યવસ્થા ઉપલબ્ધ કરાવી છે, જેના પરિણામો હવે દેખાવા લાગ્યા છે.

અમિત શાહે વધુમાં કહૃાું કે, કોંગ્રેસે એમના શાસનમાં સરદારનું નામ ભૂલાય એવા કામ કર્યા. મોદીજીએ એવી વ્યસ્થા કરી કે સરદારનું નામ કોઈ ભૂંસી નહિ શકે. મોદીજીની પ્રેરણાથી સરદાર પટેલ સ્પોર્ટ્સ એક્ધલેવ બની રહૃાું છે. જે યુવાનો સાથે વર્ષો સુધી જોડાયેલું રહેશે. ૩૨૦૦ કરોડ સરકારી અને ૧૪૦૦ કરોડના ખર્ચે PPE મોડલની મદદથી અહીં ૪૬૦૦ કરોડનું સ્પોર્ટ્સ કોમ્પ્લેક્ષ હશે. આ એક્ધ્લેવમાં હોકી સ્ટેડિયમ ધ્યાનચંદજીના નામથી બનશે. ૨૦૦૩ થી હું મોદીજી સાથે કામ કરૂં છું. મોદીજીએ હંમેશા કહૃાું છે કે રમતમાં જ્યાં સુધી યુવાનો આગળ નહીં આવે દેશ માટે કઈ નહિ કરી શકે.

નરેન્દ્ર મોદી સ્ટેડિયમના ઉદ્ઘાટન પ્રસંગે રાષ્ટ્રપતિ રામનાથ કોવિંદે જણાવ્યું હતું કે, રમતગમતની સવલતોનો વિકાસ ખૂબ જ મહત્વપૂર્ણ છે, અને તેનાથી પણ વધુ મહત્વપૂર્ણ છે કે વ્યાપક સ્તર પર પ્રતિભાશાળી ખેલાડીઓ તેનો લાભ ઉઠાવી શકે. ફેસિલિટીની સાથે એક્સેસ ટુ ફેસિલિટી બંને જરુરી છે. સારું સ્પોર્ટ્સ ઈન્ફ્રાસ્ટ્રક્ચર અને સ્પોર્ટ્સમાં ઉત્કૃષ્ટતા કોઈપણ દેશના વિકાસના માપદૃંડ હોય છે. રાષ્ટ્રપતિએ આજથી શરુ થનારી ભારત વિરુદ્ધ ઈંગ્લેન્ડની મેચ માટે પણ તમામ ખેલાડીઓને શુભેચ્છા આપી હતી.

આ સ્ટેડિયમમાં ભારત અને ઈંગ્લેન્ડ વચ્ચે ડે-નાઈટ ટેસ્ટ રમાઈ રહી છે. સ્ટેડિયમમાં સવા લાખ લોકો એક સાથે બેસી શકે તેવી વ્યવસ્થા છે. સ્ટેડિયમનું ઉદ્ઘાટન થતાં જ મેચ જોવા આવેલા હજારો પ્રેક્ષકોની લાંબી-લાંબી લાઈનો લાગી ગઈ હતી. જોકે, કોરોનાને ધ્યાનમાં રાખતા સ્ટેડિયમની ક્ષમતાની અડધી ટિકિટનું જ વેચાણ કરાયું છે. નવા મોટેરા સ્ટેડિયમમાં રમાનારી પહેલી મેચ જોવા આવેલા લોકોમાં પણ અજબનો ઉત્સાહ જોવા મળી રહૃાો છે. કેટલાક લોકો ટ્રેડિશનલ ગુજરાતી કપડાં પહેરીને સ્ટેડિયમ પર આવી પહોંચ્યા હતા, તો બીજી તરફ ભારતનો ધ્વજ લઈને પણ અનેક લોકો સ્ટેડિયમની બહાર જોવા મળ્યા હતા. માત્ર અમદાવાદ જ નહીં, પરંતુ બહારગામના લોકો પણ મેચ જોવા માટે આવી પહોંચ્યા હતા.