બોક્સિગં ડે ટેસ્ટ: ટીમમાં જાડેજા, રાહુલ, પંત અને ગિલનું રમવું ફાઈનલ..!

એડિલેડ ટેસ્ટમાં ઓસ્ટ્રેલિયા સામે ભારતીય ટીમના ધબડકા બાદ હવે બીજી ટેસ્ટમાં મોટા ફેરફારો જોવા મળી શકે છે. મેલબોર્ન ટેસ્ટમાં ભારતીય ટીમ પાંચ જેટલા નવા ખેલાડીઓ સાથે ટેસ્ટ મેચમાં રમવા ઉતરી શકે છે. જેમાંથી બે ફેરફારો વિરાટ કોહલીની અનુપસ્થિતિ અને મોહમ્મદ શમીની ઈજાના કારણે હશે. બીસીસીઆઈના સૂત્રોએ જણાવ્યું કે, ઓપનર પૃથ્વી શોની જગ્યાએ કે.એલ રાહુલને રિપ્લેસ કરી શકાય છે. વિરાટ કોહલીની જગ્યાએ નંબર-૪ પર યુવા ખેલાડી શુભમન ગિલને તક મળી શકે છે. હનુમા વિહારીની જગ્યાએ રવિન્દ્ર જાડેજા, રિદ્ધિમાન સાહા પણ વિકેટકીપરનું સ્થાન ગુમાવી શકે છે અને રિષભ પંત તેની જગ્યા લઈ શકે છે. જ્યારે ઈજાગ્રસ્ત મોહમ્મદ શમીના સ્થાને મોહમ્મદ સિરાજ અથવા નવદીપ સૈની આવી શકે છે. સિરાજ અને સૈની પહેલાથી જ સ્ક્વોડનો ભાગ છે અને પેટ કમિન્સના બાઉન્સર રમત સમયે ઈજાગ્રસ્ત થયેલા શમીના રિપ્લેસમેન્ટ તરીકે બીસીસીઆઈ હાલમાં ખેલાડીનું નામ જાહેર કરવા ઈચ્છતી નથી.
મહાન લેગ-સ્પિનર શેન વોર્ને પણ કહૃાું હતું કે, પૃથ્વી શોએ ઘણી બધી ટેકનિકલ ભૂલો બતાવી છે અને તે ટેસ્ટ ક્રિકેટ માટે હજુ તૈયાર નથી. તેના કેસમાં સૌથી ખરાબ બાબત છે તેની ખરાબ ફિલ્ડિંગ. શોની ગેરહાજરીમાં મયંક અગ્રવાલ IPL થી જ શાનદાર ફોર્મમાં રહેલા કે.એલ રાહુલ સાથે બેટિંગ શરૂ કરી શકે છે. જોકે ક્રિકેટરમાંથી કોમેન્ટેટર બનેલા સંજય માંજરેકરે રાહુલે રમેલી છેલ્લી પાંચ ટેસ્ટ સીરિઝમાં તેના ખરાબ ફોર્મનો મુદ્દો પણ ઉછાળ્યો છે. રાહુલની સાઉથ આફ્રિકા સામે ૭.૧ એવરેજ, ઈંગ્લેન્ડ સામે ૨૯ની એવરેજ, વેસ્ટ ઈન્ડિઝ સામે ઘર આંગણે ૧૮ની એવરેજ, ઓસ્ટ્રેલિયા સામે ૧૦.૭ની એવરેજ અને વેસ્ટ ઈન્ડીઝ સામે ૨૫.૪ની એવરેજ રહી છે.
ત્યારે બીજી તરફ સૂત્રો કહે છે, ક્રિકેટમાં ફોર્મ જ બધું છે અને હાલમાં તે ફોર્મમાં છે. બીજી તરફ વિરાટ કોહલીની જગ્યાએ નંબર.૪ પર રમવા માટે આવનાર શુભમન ગિલે સિડનીમાં રમાયેલી બીજી વોર્મ-અપ ગેમાં ૪૩ અને ૬૫ રનની ઈનિંગ્સથી સૌ કોઈને પ્રભાવિત કર્યા હતા. જ્યારે એડિલડમાં માત્ર ૧૬ અને ૮ રન બનાવી શકેલા વિહારીના સ્થાને ઓલરાઉન્ડર રવિન્દ્ર જાડેજા જોવા મળી શકે છે. એવામાં ભારત પાસે બે સ્પિનર્સ અને ત્રણ ઝડપી બોલર્સ હશે. ઉપરાંત જાડેજા ફિલ્ડિંગમાં પણ ઉપયોગી સાબિત થઈ શકે છે.