વડા પ્રધાન નરેન્દ્ર મોદી ૩૧મીએ કેવડિયા કોલોની ખાતે ક્રૂઝ સેવાનું ઉદ્ઘાટન કરશે

નમદા ડેમ પાસે આવેલા સ્ટેચ્યુ ઓફ યુનિટી પાસે ૨૦૦ પ્રવાસીઓને એક સાથે બેસાડી છ કિમીનો ફેરાવો ફરી મનોરંજન સાથે બોટિંગ કરાવતી ફેરી ક્રૂઝ સર્વિસ હવે આગામી ૩૧ મી ઓક્ટોબરે વડા પ્રધાન નરેન્દ્ર મોદીના હસ્તે લોકાર્પણ થાય તેવી શક્યતાઓ વચ્ચે પુન: તૈયારીઓ કરવામાં આવી રહી છે. જોકે, કોરોના મહામારી વચ્ચે સોશિયલ ડિસ્ટન્સ માટે ૫૦ જેટલા પ્રવાસીઓની સફર કરાવવામાં આવશે તેવી તૈયારી સાથે આ સેવા પ્રવાસીઓ માટે ખુલ્લી મુકાશે. એક પ્રવાસી દીઠ ૩૦૦ રૂપિયાની ટિકિટ નક્કી કરવામાં આવી છે. વડા પ્રધાન ૩૦મીએ જ અમદાવાદ આવીને ત્યાંથી રીવર ફ્રન્ટ ખાતેથી સી પ્લેનથી કેવડિયા કોલોની જાય એવી પણ શક્યતાઓ વ્યકત કરવામાં આવી રહી છે.
નર્મદા જિલ્લામાં આવેલી વિશ્વની સૌથી ઊંચી પ્રતિમા સ્ટેચ્યૂ ઓફ યુનિટી જે દૃેશ અને દૃુનિયામાં પ્રચલિત થઈ છે. જેને નિહાળવા બે વર્ષમાં ૪૪ લાખ કરતા વધુ પ્રવાસીઓ આવી ચુક્યા છે. સરકાર દ્વારા પણ અહીં આવતા પ્રવાસીઓ માટે અનેક આકર્ષણો ઊભા કરવામાં આવ્યા છે. જેમાં હવે પ્રવાસીઓ માટે વધુ એક આકર્ષણ ક્રૂઝ સર્વિર શરૂ કરવામાં આવશે. હાલમાં સ્ટેચ્યૂ ઑફ લિબર્ટી પાસે ક્રૂઝ દ્વારા લિબર્ટીની આજુબાજુ ફરી લિબર્ટી જોઈ શકાય છે તેમ હવે કેવડિયા પાસે બનેલા સ્ટેચ્યુ ઓફ યુનિટી પાસે પણ ક્રૂઝ ફરશે. જેમાં પ્રવાસીઓ બોટિંગની મઝા માણી શકશે. આ ક્રૂઝમાં સામાન્ય સંજોગોમાં એક સાથે ૨૦૦ જેટલા પ્રવાસીઓ સવારી કરી શકશે, પરંતુ હાલમાં ચાલી રહેલી કોરોના મહામારીની સ્થિતિને જોતાં માત્ર ૫૦ મુસાફરોને જ એક રાઉન્ડમાં બેસાડવામાં આવશે.